लकडाउनको उल्लंघन गर्दै जनकपुरधाममा नाराबाजी गर्ने जनता समाजवादी पार्टीका १५ जना युवालाई प्रहरीले आज पक्राउ गरेको छ । सो पार्टीका युवा नेता नविन यादव र मुकेश झाको नेतृत्वमा प्रदर्शन गरिएको छ ।

केही दिन अघि लकडाउन उल्लंघन गरेको आरोपमा जनता समाजवादी पार्टीका प्रदेश सांसद अशोक यादवको गाडी प्रहरीले जनकपुरधामको भानुचोकबाट पक्राउ गरेको थियो । त्यस क्रममा प्रदेश सांसद यादवले प्रहरीलाई ‘तिमीहरु ‘मलाई चिन्दैनौं? म को हुँ?’ लगायतका शब्द प्रयोग गरी पदको धाक देखाउँदै प्रहरीलाई अभद्र व्यवहार गरेका थिए । सोही विषयको समाचार केही सञ्चार माध्यममा आएपछि प्रहरी र मिडियाको विरोधमा जनता समाजवादी पार्टीका युवा नेताहरु आन्दोलनमा उर्लेका छन् ।

लकडाउनको उल्लंघन गरी प्रदर्शनमा उत्रेकाले उनीहरुलाई पक्राउ गरी जिल्ला प्रहरी कार्यालयको हिरासतमा राखेको धनुषाका प्रहरी नायव उपरीक्षक रामेश्वर कार्कीले जानकारी दिए । समाजवादी विद्यार्थी युनियनका बिद्यार्थी नेताहरुको नेतृत्वमा रहेको टोलीले जनकपुरधामको बसहिया रोडस्थित दक्षिणकाली मन्दिर नजिकबाट प्रहरीको विरोधमा नारावाजी गर्दै जिल्ला प्रशासन कार्यालय जाने क्रममा माछा बजारबाट पक्राउ गरिएको हो ।