वीरगञ्जको घन्टाघरमा भेटिएको वेवारिसे शवमा कोरोनाभाइरस संक्रमण पुष्टि भएको छ । आज बिहान मृत भेटिएका एक युवामा कोरोना संक्रमण पुष्टि भएको हो ।

योसँगै, नेपालमा कोरोनाभाइरस संक्रमणबाट मृत्यु हुनेको संख्या १७ पुगेको छ । यसअघि नेपालमा कोरोना संक्रमणबाट १६ जनाको मृत्यु भइसकेको छ ।

वीरगञ्जमा भेटिएका मृतकको शव पोष्टमार्टमपछि पनि नारायणी अस्पतालमै राखिएको थियो । उनको नाम, थर र ठेगाना खुलेको छैन ।

बेवारिसे अवस्थामा भेटिएको उक्त शवको पिसीआर परीक्षणका लागि अस्पतालले स्वाब संकलन गरेको थियो ।

सोक्रममा मृतकको पिसीआर रिपोर्ट पोजेटिभ आएको वीरगञ्जस्थित नारायणी अस्पतालले जनाएको छ ।

शव उठाउने काममा खटिएका तीन जना प्रहरीलाई क्वारेन्टाइनमा राखिएको छ ।