बुटवल : रुपन्देही र पाल्पामा गरी आज थप २ जना कोरोना संक्रमितको मृत्यु भएको छ । मृत्यु हुनेमा तिलोत्तमा नगरपालिकाका १ जना पुरुष र तानसेन नगरपालिकाका १ जना रहेका छन् ।
तिलोत्तमा ७ का ७५ वर्षिय पुरुषको बुटवलको कोरोना बिशेष अस्पतालमा उपचारका क्रममा आज बिहान पौने ८ बजे मृत्यु भएको लुम्बिनी प्रादेशिक अस्पतालले जनाएको छ । स्वास्थ्यमा समस्या आएपछि उनी कार्तिक ५ गते पुगेका थिए ।
कोरोना पुष्टि भएपछि उनलाई कोरोना बिशेष अस्पताल भर्ना गरिएको थियो भने उनी एक भन्दा बढी रोगबाट संक्रमित रहेको अस्पतालका प्रवक्ता डा. विष्णु गौतमले बताउनुभयो । योसँगै रुपन्देहीमा मृत्यु हुनेको संख्या ६२ पुगेको छ ।
त्यस्तै, पाल्पाको तानसेन नगरपालिका–१ गैरागाउँका ५६ वर्षीय पुरुषको मिसन अस्पताल तानसेनमा उपचारका क्रममा आज बिहान मृत्यु भएको छ । असोज ३० गते कोरोना संक्रमण पुष्टि भएका ती पुरुषमा ढाड दुख्ने समस्या भएपछि मिसन अस्पताल भर्ना भएको स्वास्थ्य कार्यालयका सूचना अधिकारी ओमप्रकाश पन्थीले जानकारी दिनुभयो । यो संगै पाल्पामा कोरोना संक्रमणबाट मृत्यु हुनेको संख्या ८ पुगेको छ भने जिल्लामा २ सय ८२ जना सक्रिय संक्रमित रहेका छन् ।