काठमाण्डौ : गत आइतवार राति करिब १० बजे दाङको लमहीमा गुडिरहेको टिप्परलाई अचानक बाटोमै रोकियो । उक्त टिप्पर लमही ७ कमानपुरस्थित सम्राट सिमेन्ट उद्योगमा चुन ढुंगा छोडेर फर्किंदै थियो । तीन जना युवाले तरवार देखाएर टिप्परलाई रोके । लगत्तै चालक र सहचालकलाई रुखमा बाधियो । र टिप्परमा रहेका दुई महिलामाथि सामूहिक बलात्कार भयो । जसमध्ये एकजना चालककी श्रीमती र अर्की एकजना चालककै साली थिए ।
जिल्ला प्रहरी कार्यालय दाङका अनुसार सोमवार पीडित महिलाहरूको स्वास्थ्य परीक्षण गरिएको थियो र रिपोर्टमा दुबै जनामाथि बलात्कार भएको देखिएको छ । प्रहरीले घटनामा संलग्न तीन जनामध्ये एक जनालाई पक्राउ गरेको छ । पक्राउ पर्नेमा लमही ७ कमानपुरका २१ वर्षीय किरण बुढा रहेका छन् ।
फरार दुई युवकको पहिचान खुलिसकेको र खोजी कार्य भईरहेको प्रहरीले जनाएको छ । फरार हुनेमा लमही नगरपालिका वडा नं– ७ कमानपुरका २० वर्षीय प्रेम परियार र लमही–६ देउपुरका २० वर्षीय अर्जुन चौधरी (अरविन्द्र) रहेका छन् । फरार २० वर्षीय प्रेम परियार घरबाट प्रहरीले मोबाइल र नगद २६ हजार रुपैयाँ बरामद गरेको छ ।