काठमाण्डौ : युट्युवले भारतको सोसल कमर्स स्टार्टअप सिमसिम कम्पनी खरिद गरेको छ । उक्त स्टार्टअपको मूल्याङ्कन ७० मिलियन डलर गरिएको छ । दुई वर्ष पुरानो सिमसिमको गुडगाउँमा मूख्य कार्यालय रहेको छ । सिमसिमले भारतमा रहेका साना व्यवसायलाई ईकमर्समा स्थानान्तरण गर्न भिडिओ तथा क्रियटरको प्रभावलाई उपयोग गर्दै आएको छ । यो कम्पनीको एपले स्थानीय व्यवसायलाई प्रभावशाली व्यक्ति तथा ग्राहकसँग जोड्ने काम गर्दै आएको छ ।
युट्युवले अधिग्रहण गरेसँगै सिमसिमबाट भारतका साना व्यवसाय र खुद्रा बिक्रेताले नयाँ ग्राहकसम्म पुग्नका लागि थप शक्तिशाली उपाय प्राप्त गर्ने विश्वास लिइएको छ । भारतमा मात्रै युट्युवका मासिक ४५ करोड सक्रिय प्रयोगकर्ता रहेका छन् । गुगलले यसअघि भारतको ग्ल्यान्स र डेलीहन्ट गरी दुई अन्य स्टार्टअपमा समेत लगानी गरिसकेको छ ।