काठमाण्डौ : आजबाट मौसममा क्रमिक सुधार हुने मौसमविद्ले बताएका छन् । मौसमविद् वरुण पौडेलले बिहीबारदेखि मौसममा सुधार हुँदै जाने बताएका हुन् । अर्को प्रणाली नआएसम्मका लागि अब ठूलो पानी पर्ने सम्भावना नरहेको उनको भनाई छ । आजबाट धेरै ठाउँमा घाम लाग्ने बताइएको छ ।
अर्का मौसमविद् समिर श्रेष्ठका अनुसार आजबाट मौसममा सुधार आउने भएपनि पूर्ण सुक्खा भने नहुने बताए । एकदुई ठाउँमा थोरै पानी पर्ने सम्भावना कायमै रहेको र त्यसले गर्दा पूर्ण सुक्खा भने नहुने उनको भनाई छ । तर अब ठूलो पानी पर्ने सम्भावना भने नरहेको उनले बताए ।
नेपालमा भारतको बिहार र उत्तर प्रदेश आसपास रहेको न्यून चापीय प्रणाली र पश्चिमी वायु प्रणालीको संयुक्त प्रभावका कारण गत असोज ३१ गतेबाट कर्णाली तथा सुदूरपश्चिम प्रदेशमा अत्यधिक वर्षा र अन्य प्रदेशका केही स्थानमा भारी वर्षा भएको थियो ।