पाल्पामा विद्यालय जाने क्रममा बेहोस भएर एक क्षात्राले ज्यान गुमाएकि छन् ।
रम्भा गाउँपालिका–५, ताहुँमा अवस्थित रम्भा माध्यमिक विद्यालयको कक्षा १० मा अध्ययनरत पूर्वखोला गाउँपालिका–६ हेक्लाङकी १६ वर्षीया कमला फालको बुधबार बिहान ट्युसन पढ्न जाने क्रममा मृत्यु भएको हो । बिहान पौने ८ बजेतिर विद्यालयमा ट्युसन पढ्न आउने क्रममा कमला विद्यालयनजिकै बेहोस भएकी थिइन् । तत्पश्चात उनलाई उपचारका लागी स्थानीय ताहु प्राथमिक केन्द्रमा लगिएको थियो । त्यहाँ उपचार संभव नभएपछी सदरमुकाम तानसेन ल्याउँदै गर्दा बाटोमै कमलाको ज्यान गएको विद्यालयका प्रध्यानाध्यापक तुल्सी अर्यालले जानकारी दिनुभयो । कमलाको घर र विद्यालय बिचको दुरी २ किलोमिटर रहेको स्थानियहरूले जानकारी दिएका छन् ।
कमलाको ज्यान गएपछि आत्तिएर रुने क्रममा उनका ९ जना साथीसमेत बेहोस भएका छन् । रोएर बेहोस भएका मध्ये ७ जनाको प्राथमिक स्वास्थ्य केन्द्रमा उपचार भैरहेको र अन्य २ जनाको युनाइटेड मिसन अस्पताल तानसेनमा उपचार भैरहेको छ ।
जिल्ला प्रहरी कार्यालय पाल्पाले भने घटनाको बारेमा अनुसन्धान भैरहेको जनाएको छ ।