सिमकोट – स्थानीय प्रशासनले मदिरा बिक्री–वितरणमा रोक लगाएको छ। वैशाख २७ गते राति १२ बजेबाट मतगणना कार्य सम्पन्न नहुँदासम्मका लागि मदिरा बिक्री–वितरणमा रोक लगाइएको हो।

स्वच्छ, निष्पक्ष, भयरहित र शान्तिपूर्ण रूपमा निर्वाचन सम्पन्न गर्न मदिरा बेचबिखनमा पूर्ण रोक लगाएको प्रमुख जिल्ला अधिकारी सीता परियारले बताइन्।

उनले निर्वाचन सुुरक्षा व्यवस्था २०७८ को दफा ६(थ) तथा जिल्ला कमान्ड पोस्ट् तथा जिल्ला निर्वाचन सेलको निर्णयअनुसार मदिरा बिक्रीमा रोक लगाएको जानकारी दिइन्।

वैशाख २७ गते राति १२ बजेबाट मतगणना कार्यको नतिजा घोषणा नभएसम्मका लागि मदिरा बिक्री गर्न पाइने छैन।

यो नियम जिल्लाका सात वटै गाउँपालिकामा लागू हुनेछ। यस निर्णयविरुद्ध कार्य गरेको पाइए कानुनी कारबाही गर्नेसमेत जनाइएको छ। हाल सात बजेपछि मदिरा बिक्रीमा रोक लाग्दै आएको छ।