सिन्धुली — दुधौली नगरपालिका-३ को वडाध्यक्षमा भद्रा माझी निर्वाचित भएकी छिन् । जिल्लामा ७९ वडा छन् । तीमध्ये एकमात्र वडाध्यक्ष पदकी महिला उम्मेदवार माझीले ८०६ मत प्राप्त गरि विजयी भएकी हुन् । उनका निटतम प्रतिद्धन्द्वी एमालेका किसनलाल कुमरले ५५७ मत प्राप्त गरे । माओवादी केन्द्रका उम्मेदवारले ३४३ मत प्राप्त गरि तेस्रो भए ।
नेपाली कांग्रेसबाट वडाध्यक्षमा माझीको विजयीसँगै ०४९, ०५४ देखि ०७४ सम्मको एमाले किल्ला भत्किएको छ । अघिल्ला तीन निर्वाचनमा वडा नं ३ मा एमालेले जित्दै आएको थियो । कांग्रेसले महिलामा माझीलाई मात्र वडाध्यक्षको उम्मेदवार बनाएको थियो ।
अन्य दलहरु एमाले माओवादी केन्द्र, लगायतले वडाध्यक्षमा महिला उम्मेदवार बनाएका थिएनन् । जितपछि माझीले विपन्न परिवारलाई सम्पन्नताको बाटोमा लैजान आयआर्जनका कार्यक्रममा जोड दिने बताइन् । महिलाले पनि मौका पाए नेतृत्व लिन सक्छन् भन्ने आफुले देखाइदिएको उनको प्रतिक्रिया थियो ।
जंगली हात्तीले दुःख दिएर हैरान बनाएकाले नियन्त्रणका लागि आफु लागि पर्ने नवनिर्वाचित वडाध्यक्ष माझीले बताइन् । वडामा माझी सहित कांग्रेसको प्यानल नै विजयी भएको छ ।
दुधौली नगरपाकिला वडा नं १ मा कांग्रेसका जयबहादुर पौडेल, वडा नं २ मा एमालेका रितेश राउत, हालसम्म गणना सम्पन्न वडा नं १२, १३ र १४ मा माओवाादी केन्द्रका क्रमश दिनेश भट्टराई, दिपक खड्का र भैरव पुलामी वडाध्यक्षमा निर्वाचित भएका छन् ।
