आन्तरिक उडानमा जहाजको इनरुटको मौसम सम्बन्धी निर्णय गर्ने अधिकार विमानस्थलले मात्रै गर्ने भएपछि दुर्गम क्षेत्रमा हुने उडान रोकिएको छ ।
अहिलेसम्म पाइलट इन कमान्डमा रहेको अधिकार अब विमानस्थलमा मात्रै सीमित गर्ने निर्णय गरिएपछि इनरुटको मौसमबारे जानकारी कसले दिने भन्ने अन्यौल रहेकाले उडान नभएको तारा एयरका प्रवक्ता सुदर्शन बर्तौलाले जानकारी दिए ।
उनका अनुसार काठमाडौंबाट दुर्गम क्षेत्रमा उडान हुने जहाजहरू आज कुनै पनि गन्तव्यमा उडेका छैनन् ।
‘मौसमबारे जानकारी कसले दिने भन्ने विषयमा कन्ट्रोल टावरले मौसम विभागलाई देखाएको र एयरलाइन्सहरूलाई मौसम विभागलाई देखाउँछ, एयरलाइन्सलाई मौसमको आधिकारिक जानकारी लिन समस्या भएको छ,’ उनले भने ।
प्रवक्ता बर्तौलाले नागरिक उड्ययन प्राधिकरणले सम्बन्धित निकायको समन्वय बिना भएका यस्ता हचुवा निर्णयले यात्रुहरूले सास्ती बेहोर्नु परेको समेत बताए ।
निर्णय सहि भएपनि, निर्णय कार्यान्वयनका लागि आवश्यक भौतिक पुर्वाधार र समन्वय गरी सुरक्षित उडान गर्ने वातावरण बनाउन उनले अपिल समेत गरेका छन् ।