युक्रेनी सैनिकहरूसँग मिलेर रुसविरुद्ध लडिरहेका बेलायती सैनिक जोर्डन ग्याट्ली युद्धमोर्चामा मारिएको खबर बेलायती पत्रिकाहरूले आइतवार दिएका छन् ।
सेभेरोडोनेत्स्क शहरमा भइरहेको युद्धमा उनी मारिएका हुन् । त्यस शहरबाट रुसी सेनालाई पछि हटाउनका लागि युक्रेनीहरूले कोशिश गरिरहेका छन् ।
हालैको दिनमा रुसी सेनाले सेभेरोडोनेत्स्कका अधिकांश भाग नियन्त्रणमा लिइसकेको छ । युक्रेनी सेना तथा तिनलाई सहयोग गर्न आएका अन्तर्राष्ट्रिय सैनिकहरूले ठूलो क्षति बेहोरेका छन् ।
ग्याट्लीले बेलायती सेनाको द राइफल्स इकाइमा राइफलम्यानका रूपमा काम गरेका थिए । गत मार्च महिनामा उनी बेलायती सेनाबाट राजीनामा दिएर युक्रेन पुगेका थिए । उनले युक्रेनी सैनिकहरूलाई तालिम पनि दिइरहेका थिए ।
युक्रेनमा रुसीहरूबाट मारिने ग्याट्ली दोस्रा बेलायती सैनिक हुन् । गत अप्रिल महिनामा अर्का बेलायती सैीनक स्कट सिब्लीको मृत्यु भएको थियो ।
यस युद्धमा अन्य पनि बेलायती सैनिक मारिएका हुन सक्छन् । किएभले मारिएका विदेशी सैनिकको बारेमा कुनै जानकारी दिने गरेको छैन भने लन्डनले पनि आफ्नो क्षतिको विवरण सार्वजनिक गर्ने गरेको छैन ।
