मिल्छन् शब्द अनेक घातक हुने हो शब्द यो शोषण ।
यस्को हुन्छ प्रयोग स्वार्थ लिनमा गर्छन् नि स्वार्थीगण ।।
घाती गर्दछ घात गुप्ततहले जान्दैन जो तो जन ।
आफू बन्छ स्वयं शिकार त्यसको बुझ्दैन सोझो मन ।।

चल्छन् शोषण अर्थ लुट्न र यता हेर्दा भयो आर्थिक ।
यस्का छन् नि अनेक तौरतरिका खान्छन् कला माफिक ।।
अड्डामा घुसपेस चल्दछ यता अर्को छ व्यापारिक ।
ठग्छन् दुष्ट समाजमा पनि कतै छन् कार्य सामाजिक ।।

ठूलो शोषण झन् चलाख जनले गर्छन् सधै बौद्धिक ।
भुट्छन् बुद्धि कुरा बटार्न चतुरा मानिन्छ यो प्राज्ञिक ।।
लाटो बुद्धि छलिन्छ हुन्छ हमला गर्छन् नि साङ्घातिक ।
सद्दै दास बनाउँछन् ठगहरू हुन्छन् निकै मायिक ।।

शिक्षाक्षेत्र छ पूर्ण शोषित अझै पार्टीहरूले गरे ।
संस्थाभित्र दलीय नाम र ध्वजा बोकाउनेमा परे ।।
विद्या हासिल गर्न केन्द्रित हुने बेला कचल्ट्याइयो ।
खाए शैक्षिक त्यो गुणस्तर यिनी माथा जगल्ट्याइयो ।।

कोही छन् चतुरे विशिष्ट प्रतिभा थिच्छन् र मिच्छन् कला ।
आफन्ती र दलीयवाद नभए पूरा निमोठ्छन् गला ।।
राम्रो हैन जतासुकैतिर सधै हाम्रो दले चाहियो ।
हत्या शोषण योग्यतातिर चल्यो यस्तो यहाँ पाइयो ।।

राम्रा छन् कविता भने पनि तिनी चोर्नेहरू भेटिए ।
अर्काको क्षमता लिए अघि बढे ताली प्रशंसा लिए ।।
चारैतर्फ नयाँ नयाँ तबरले चल्दो छ है शोषण ।
मासौँ शोषकका कुबुद्धि जति छन् बाँकी नराखौँ कण ।।

२०७९/११/१४/१ 

योगिकुटी, बुटवल ।