लुम्बिनी प्रदेशमा नयाँ सरकार गठनका लागि दिइएको समय सकिँदैछ ।
प्रदेश प्रमुख अमिक शेरचनले वैशाख १२ गते संविधानको धारा १६८ को उपधारा २ अनुसार दुई वा दुईभन्दा बढी दलहरुको समर्थन जुटाएर मुख्यमन्त्रीमा दाबी पेस गर्न आज अपराह्न ४ बजेसम्मको समय दिएका थिए ।
११ गते (सोमबार) मुख्यमन्त्री लीला गिरीले विश्वासको मत नपाएपछि लुम्बिनी प्रदेश सरकार ढलेको थियो ।
लुम्बिनीमा नेपाली कांग्रेस संसदीय दलका नेता डिल्लीबहादुर चौधरीलाई मुख्यमन्त्री बनाउन एमाले र राप्रपाबाहेक ८ दलका ५३ सांसद एक ठाँउमा उभिएका छन् । तर कांग्रेस माओवादीबीच भागबन्डा नमिल्दा सरकार गठनमा सहमति जुट्न सकेको छैन ।
८७ सांसद मध्ये लुम्बिनीमा बहुमतका लागि ४४ मत आवश्यक पर्छ ।
लुम्बिनी प्रदेशमा एमालेका २९ ,नेपाली कांग्रेस २७, नेकपा माओवादी ११, राप्रपा ४, नागरिक उन्मुक्ति पार्टी ४, जसपा, लोसपा, जनमत ३÷३, राष्ट्रिय जनमोर्चा र एकीकृत समाजवादी १/१, स्वतन्त्र १ प्रदेशसभा सदस्य छन् ।
