काठमाण्डौ – अहिले सामाजिक सञ्जाल फेसबुकमा बालेनको आधिकारिक फेसबुक पेजबाट लिइएको जस्तो देखिने स्क्रिनशट फैलिएको छ । ४५ हजार रियाक्सन, दुई हजार कमेन्ट र ४६१ शेयर देखिने उक्त स्क्रिनशटमा बालेनले हालै रास्वपाले सार्वजनिक गरेको एम्बलेन्सको बारेमा आफ्नो धारणा राखिएको देखाइएको छ।
“एम्वुलेन्स भरतपुर मेडिकल कलेजको ! डाक्टर सहितको जनशक्ति पनि भरतपुर मेडिकल कलेज कै ! नाम चाहि रास्वपाको ! सेवा चाहि रवीको मोवाइल क्लिनिक रे ! !! यति सम्मको झूठ पनि वजारमा विक्दो रैछ ! विकाउन सक्ने व्यापारी अनि त्यसलाई पत्याउने उपभोक्ता रहून्जेल कसैको केही लाग्दैन !” भाइरल स्क्रिनशटमा लेखिएको छ ।
स्क्रिनशटमा बालेनको ब्लु टिक सहितको पेजको नाम समावेश गरिएको छ । उक्त पोस्ट बालेनको पेजमा हेर्दा भने भेटिँदैन । आईफोनबाट लिइएको उक्त स्क्रिनशटमा भएको पोस्टको टेक्स्ट र यूआईको टेक्स्ट पनि भिन्नाभिनै छ । पोस्टको टेक्स्ट प्रष्ट छ भने रियाक्सन, कमेन्ट र शेयर लेखिएको टेक्स्ट मधुरो देखिन्छ । यी कुराहरूबाट पनि यो पोस्ट सम्पादन गरिएको हो भन्ने अनुमान लगाउन सकिन्छ।
त्यसबाहेक पनि ४५ हजार लाइक, दुई हजार कमेन्ट र ४६१ शयेर भएको स्क्रिनशट बालेनको अर्को पोस्टबाट लिइएको देखिन्छ । जुलाई २६ मा बालेनले ‘लार्भा नष्ट गर्ने अभियान’ सम्बन्धी राखेको पोस्टमा उनी नै रियाक्सन र कमेन्ट छन् । तर, शेयर भने एक अङ्कले बढेको छ । उक्त पोस्टमा भएको शेयर हेर्ने हो भने अन्तिम पटक उक्त पोस्ट प्रकाश अधिकारी नाम भएका प्रयोगकर्ताले चार घण्टाअघि (आईतबार, अगस्ट ६, २०२३, १२ः१२ मिनेट) शेयर गरेको देखिन्छ । यसबाट पोस्ट एडिट गर्ने व्यक्तिले यही पोस्टको स्क्रिनशट लिएर पछि आफ्नो अकाउन्टमा उक्त कुरा लेखेर फोटो एडिट गरेको देखिन्छ ।
